Sa pagtatapos ng taon, nagiging mas aktibo ang paggalaw ng mga tao at sasakyan, kaya karaniwang tumataas ang bilang ng mga aksidente sa trapiko.
Hinihiling namin sa bawat residente ng prefecture na palakasin ang kamalayan sa kaligtasan sa trapiko at magsikap na magmaneho nang ligtas, nang may sapat na oras at kapanatagan ng isip.
1. Panahon ng kampanya
Sampung araw mula Disyembre 1, 2026 (Martes) hanggang Disyembre 10 (Huwebes)
(Ang Disyembre 1 (Martes) ay “Araw ng Kampanya ng Mie Prefecture para sa Layuning Zero (0) Pagmamaneho nang Nakainom.”)
2. Mga pangunahing layunin ng kampanya
(1) Pag-iwas sa mga aksidente sa trapiko na kinasasangkutan ng mga bata at matatanda
- Para sa mga matatanda, unawain ang epekto ng mga pagbabago sa pisikal na kakayahan sa pagmamaneho at ugaliing magmaneho ayon sa lagay ng panahon, kondisyon ng katawan at iba pang sitwasyon.
- Sa mga rutang ginagamit papunta sa paaralan at sa mga kalsadang pantahanan, sundin ang mga patakaran sa trapiko at laging isaisip na “mas dapat unahin ang mga tao sa kalsada” upang maiwasan ang mga aksidente.
- Mag-ingat sa biglang paglabas ng mga bata sa kalsada.
- Kapag itinuturo sa mga bata ang mga patakaran sa trapiko, ipaliwanag kung ano ang mapanganib at kung paano ito nagiging mapanganib.
- Sa dapit-hapon, ugaliing buksan nang mas maaga ang mga ilaw upang agad na makita ang mga naglalakad at nagbibisikleta.
(2) Ganap na pag-aalis sa mapanganib at malisyosong pagmamaneho, gaya ng pagmamaneho nang nakainom at paggamit ng smartphone habang nagmamaneho
- Mahigpit na ipinagbabawal ang pagmamaneho nang nakainom.
May mabibigat na parusa para sa pagmamaneho nang nakainom. Kapag nahuli sa ganitong pagmamaneho o nakapagdulot ng aksidente, maaaring mawalan ng trabaho o pamilya, bukod sa iba pang malubhang epekto.
- Mahigpit ding ipinagbabawal ang pagbi-bike nang nakainom.
- Ang paggamit ng smartphone habang nagmamaneho ay lubhang mapanganib at maaaring humantong sa malubhang aksidente sa trapiko, kaya huwag na huwag itong gawin.
- Unawaing mabuti ang mga pagkakaiba ng mga patakaran sa trapiko sa Japan at sa inyong sariling bansa, at magsikap na magmaneho nang ligtas.
(3) Mahigpit na pagbibigay-priyoridad sa mga naglalakad sa mga tawiran
- Kung may naglalakad malapit sa tawiran, magmenor upang agad kayong makahinto. Kapag tatawid ang isang naglalakad, laging huminto at hayaang makatawid siya nang ligtas.
- Kung may tawiran malapit sa inyo, laging doon tumawid.
Bago tumawid, huminto muna at tiyaking ligtas ang magkabilang panig ng kalsada.
- May mga drayber na maaaring hindi mapansin ang mga naglalakad.
Bago tumawid, magbigay ng senyas sa drayber, halimbawa sa pamamagitan ng bahagyang pagtataas ng kamay, at tumawid lamang kapag nakahinto na ang sasakyan.
(4) Mahigpit na wastong paggamit ng seat belt at child seat
- Para maprotektahan ang buhay, magsuot ng seat belt sa lahat ng upuan sa sasakyan.
- Kapag may batang wala pang 6 na taong gulang na sasakay, gumamit nang tama ng child seat upang maiwasan ang aksidente sa trapiko.
- Kahit 6 na taong gulang pataas, kung hindi maayos na magagamit ang seat belt dahil sa laki ng katawan o iba pang dahilan, gaya ng pagiging maliit, gumamit ng child seat o junior seat.
(5) Lubos na pag-unawa at pagsunod sa mga patakaran sa trapiko para sa mga bisikleta at partikular na maliliit na de-motor na bisikleta, at pagtataguyod ng pagsusuot ng helmet
- Ang bisikleta ay madaling gamitin ng sinuman nang walang lisensya sa pagmamaneho, ngunit bilang isang uri ng “sasakyan,” kailangan pa ring sundin ang mga patakaran sa trapiko.
- Para sa ilang paglabag sa trapiko ng mga gumagamit ng bisikleta na 16 na taong gulang pataas, ipinatutupad ang sistema ng abiso ng paglabag sa trapiko (asul na tiket).
- Tandaan na paglabag sa trapiko ang paggamit ng smartphone o earphone habang nagbibisikleta, pagsakay ng dalawang tao sa isang bisikleta at iba pa. Huwag na huwag magmanehong maaaring magdulot ng panganib sa inyong sarili o sa mga nakapaligid sa inyo.
- Para maprotektahan ang buhay, lahat ng gumagamit ng bisikleta ay dapat magsuot ng helmet.
- Buksan din nang mas maaga ang ilaw ng bisikleta at gumamit ng mga kagamitang reflective upang mas madaling makita ng ibang sasakyan.
- Ang mga electric scooter at iba pang sasakyang nakatutugon sa itinakdang pamantayan ay kabilang sa kategoryang “partikular na maliit na de-motor na bisikleta.” Hindi kailangan ng lisensya sa pagmamaneho, ngunit may mga patakaran sa trapiko tulad ng obligasyong maglagay ng plaka at kumuha ng compulsory automobile liability insurance at iba pa.
Bago gumamit ng “partikular na maliit na de-motor na bisikleta,” tiyaking nauunawaan ninyo ang mga patakaran sa trapiko at gamitin ito nang ligtas.
- Ang de-kuryenteng bisikletang may pedal (moped) ay itinuturing na ordinaryong de-motor na bisikleta o motorsiklo, kaya kailangan ng lisensya sa pagmamaneho. Mag-ingat dito.
Makikita rito ang polyeto para sa pagpapalaganap ng kaalaman (Japanese lamang)
3. Para sa mga katanungan (Japanese lamang)
Mie Prefecture, Kagawaran ng Kapaligiran at Pamumuhay, Dibisyon ng Pamumuhay at Kaligtasan sa Trapiko, Pangkat para sa Kaligtasan sa Trapiko
Numero ng telepono: 059-224-2410
